नापी अधिकृतविरुद्ध १ करोड ४ लाखको भ्रष्टाचार मुद्दा

काठमाडौं। अख्तियार दुरुपयोग अनुसन्धान आयोगले नापी कार्यालय चाबहिलमा कार्यरत अधिकृत राजु पुरीले एक करोडभन्दा बढी अकुत सम्पत्ति आर्जन गरेको निष्कर्ष निकालेको छ।

पुरीविरुद्ध एक करोड ४ लाख ३ हजार ९ सय ४१ रुपैयाँ ८३ पैसा बिगो कायम गरी आइतबार विशेष अदालतमा मुद्दा दायर भएको छ। २०५२ पुस ९ गते सरकारी सेवामा प्रवेश गरेका पुरीले यसबीचमा एक करोड २० लाख ७७ हजार ७ सय ४८ रुपैयाँ वैध आय गरेको देखिए पनि उनको सम्पत्ति २ करोड २४ लाख ८१ हजार ६ सय ९० रुपैयाँ ५२ पैसा रहेको अख्तियारले जनाएको छ।

पुरीले कमाएको अकुत सम्पत्ति श्रीमती सृजना गिरीको नाममा राखेको देखिएकाले जफत प्रयोजनका लागि उनलाई पनि प्रतिवादी बनाइएको छ।