एकीकृत समाजवादीको सचिवालय बैठक आज पनि बस्दै

काठमाडौ । नेकपा एकीकृत समाजवादीको केन्द्रीय सचिवालय बैठक आज शनिवार पनि बस्दैछ ।

पार्टी अध्यक्ष माधवकुमार नेपालको अध्यक्षतामा पुष्पलाल स्मृति प्रतिष्ठानमा शुक्रवार बसेको बैठकमा नेताहरूले बोल्न क्रम जारी रहेकाले शनिवार बिहान पुनः बस्ने गरी बैठक स्थगित भएको थियो ।

पार्टी प्रचार विभाग प्रमुख जगन्नाथ खतिवडाले बैठकमा मुलुकमा विकसित राजनीतिक घटनाक्रम, पार्टीले निर्वाह गर्नुपर्ने भूमिका, संगठन सुदृढीकरण अभियानको समीक्षा तथा समसामयिक विषयमा छलफल भइरहेको छ ।

संगठन सुदृढीकरण विशेष अभियानसम्बन्धी जानकारी गराइएको बैठकमा वर्तमान परिस्थिति र हाम्रा कार्यभार, आगामी कामको विस्तृत योजना, कामको उद्देश्य, प्राथमिकता, कार्ययोजना, कार्य विभाजन, पार्टीका रिक्त रहेको पदाधिकारी तथा सदस्यमा कसलाई मनोनित गर्ने भन्ने विषयमा प्रस्ताव र कमिटीका समायोजन तथा थपघटबारे छलफल गरिनेछ । 

३ दिनसम्म चल्ने बैठकमा जनसंगठन युवा र विद्यार्थी, विभागका काम र व्यवस्थापन, प्रचार विभागबारे पनि छलफल हुनेछ ।