नयाँ मन्त्रीहरुको शपथअघि सत्ता साझेदार दलहरुले आन्तरिक छलफल गर्ने

काठमाडौ । मंगलबार दिउँसो १ बजेका लागि तय भएको मन्त्रीहरुको शपथअघि सत्ता साझेदार दलहरुले आन्तरिक छलफल गर्ने भएका छन् ।

सत्ता साझेदार दलमा भएको मन्त्रालयको भागबण्डाअनुसार दलहरुले छलफल गरेर मन्त्रीको सूची फाइनल गर्ने बताइएको छ । 

गृह मन्त्री रवि लामिछानेले राष्ट्रपति भवन शीतल निवासमा मन्त्रीहरुको शपथको कार्यक्रम तय भएको र सोअघि दलहरुले आन्तरिक छलफल गरेर मन्त्रीको सूची फाइनल गर्ने जानकारी दिए । 

दलहरुले आ–आफ्नो पार्टीमा मंगलबार छलफल गरेपछि मन्त्रीहरुको नाम बाहिर आउने उनको भनाइ थियो । 

‘पार्टीले कुन कुन मन्त्रालयको जिम्मेवारी लिने भन्ने कुरा सहमति भइसकेको छ । को को मन्त्री बन्ने भनेर आज नामसहित बाहिर आउँछ ।

बिहान एकपटक छलफल गर्छौँ, मन्त्रालयको बाँडफाडका लागि फेरि बस्नु पर्दैन,’ लामिछानेले  भने, ‘ १ बजे शपथ हुन्छ । राष्ट्रपति कार्यालयलाई जानकारी गराइसकिएको छ ।’