कर्णाली प्रदेशका ९ हजार बढी उम्मेदवारले निर्वाचन खर्च अझै बुझाएनन्

काठमाडौं । कर्णाली प्रदेशका ९ हजार भन्दा बढी उम्मेदवारले निर्वाचन सम्पन्न भएको ३ महिना बितिसक्दा पनि खर्च विवरण बुझाएका छैनन् ।

गत वैशाख ३१ गते सम्पन्न भएको स्थानीय तह निर्वाचनमा मनोनयन दर्ता गराएका १२ हजार ८ सय ४७ जना मध्ये ९ हजार ४ सय ६ जनाले खर्च विवरण नबुझाएको प्रदेश निर्वाचन कार्यालय सुर्खेतले जनाएको हाे।

स्थानीय तह निर्वाचन ऐन, २०७३ को दफा ६४ मा निर्वाचन प्रचारप्रसार खर्च सम्बन्धी रहेको व्यवस्थामा निर्वाचन खर्चको विवरण दल, उम्मेदवार र तिनका प्रतिनिधिले निर्वाचन मत परिणाम घोषणा भएको मितिले ३० दिनभित्र आयोगले तोकेको कार्यालय समक्ष पेश गर्नुपर्ने हुन्छ ।

तर कर्णाली प्रदेशका १० जिल्लाका ७९ वटा स्थानीय तहमा मनोनयन दर्ता गराई निर्वाचन प्रतिस्पर्धामा भाग लिएका अधिकांश उम्मेदवारले खर्च विवरण पेश गरेका छैनन् ।कर्णालीमा हालसम्म ३ हजार ४ सय ४१ जनाले मात्रै खर्च विवरण बुझाएकाे प्रदेश निर्वाचन कार्यालय सुर्खेतले जनाएको छ ।