बागमती प्रदेशमा अष्टलक्ष्मी शाक्य अल्पमतमा, मुख्यमन्त्रीमा राजेन्द्र पाण्डेको दावी

हेटौडा । बागमती प्रदेशकी मुख्यमन्त्री अष्टलष्मी शाक्य अल्पमतमा परेकी छन् । नेकपा एमालेबाट मुख्यमन्त्री बनेकी शाक्यलाई नेकपा एकीकृत समाजवादीले विश्वासको मत नदिने भनेपछि शाक्य अल्पमतमा परेकी हुन् । 

नेकपा एकीकृत समाजवादीले वाग्मती प्रदेशको मुख्यमन्त्रीमा  दाबी गरेको छ ।  नेकपा एमालेका १२ सांसदले एकीकृत समाजवादी रोजेकाले मुख्यमन्त्री अष्टलक्ष्मी शाक्य अल्पमतमा परेकी छन् । एकीकृत समाजवादीबाट राजेन्द्र पाण्डेले मुख्ँयमन्त्रीमा दावी गरिरहेका छन् । 

१०९ सदस्यीय प्रदेशसभामा एमालेका ५६ सांसद छन। एकल बहुमत भएकाले २ भदौमा डोरमणि पौडेलले राजीनामा दिएपछि शाक्य मुख्यमन्त्री बनेकी थिइन् ।

तर त्यही दिन एमाले फुटेर नेकपा समाजवादी एकीकृत बन्यो । राजनीतिक दलसम्बन्धी अध्यादेश अनुसार प्रदेश र स्थानीय तहका जनप्रतिनिधिलाई दल रोज्न निर्वाचन आयोगले २२ गते साँझ ५ बजेसम्मको समय दिएको छ ।

मंगलबार एमालेका १२ सांसदले निर्वाचन आयोगको प्रदेश कार्यालय गएर एकीकृत समाजवादी रोजेको जानकारी दिएका छन् । ‘२३ गते आयोगले हाम्रो दलमा सांसद संख्या यति छ भनेर दिन्छ, लगत्तै हामी प्रदेशसभामा पेश गर्छौं,’ एकीकृत समाजवादीका सांसद राजेन्द्र पाण्डे भन्छन्, ‘त्यो दिनदेखि सरकार अल्पमतमा पर्‍यो ।’ पाण्डे आफैँ मुख्यमन्त्रीमा दावी गरिरहेका छन् । उनले नेकपा एमालेको नेतालाई विश्वासको मत दिन नसक्ने बताउँदै मुख्यमन्त्रीमा आफ्नो दावी रहेको बताए ।