प्रचण्ड फेरि माधव नेपाललाई भेट्न कोटेश्वर पुगे, के भयो कुराकानी ?

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड फेरि माधव नेपाललाई भेट्न कोटेश्वर पु्गेका छन् । आज साँझ प्रचण्ड कोटेश्वर पुगेर माधव नेपालसँग भेटवार्ता गरेका छन् । 

भेटको क्रममा माधव नेपाललाई प्रचण्डले सरकारमा आउन आग्रह गरेका स्रोतको भनाइ छ । यसअघि पनि प्रचण्डले पटकपटक माधव नेपाललाई सरकारमा आउन आग्रह गरेका थिए । 

एमाले एकताको सम्भावना सकिएको भनेर नेपाल पक्षले निष्कर्ष निकालेकै बेला प्रचण्ड माधव नेपालसँग भेटवार्ता गरेका कारण यसलाई एमाले वृत्तमा चासोका साथ हेरिएको छ । माधव नेपालले सरकारमा सहभागी हुने वचन प्रचण्डलाई दिइसकेका छैनन् । 

प्रचण्ड र माधव नेपालबीच पछिल्ला केही सातायता दिन विराएर वा दिनहुँ वार्ता भइरहेका छन् । माधव नेपाल पक्षलाई सरकारमा सहभागी गराउनकै लागि मन्त्रिपरिषद विस्तार हुन सकेको छैन । 

एमाले विभाजनका लागि कानूनी प्रक्रियामा समेत सघाउने आश्वासन प्रधानमन्त्री शेरबहादुर देउवा र माओवादी अध्यक्ष प्रचण्डले दिइसकेका छन् ।