काठमाडौं । भारतले कोरोना भाइरस (कोभिड१९) विरुद्धको केही विदेशी खोपलाई स्थानीयरुपमा परीक्षण अनिवार्य नहुने नियम ल्याएको छ । यससँगै अब फाइजर र मोडेर्नाजस्ता कम्पनीको खोप भारत ल्याउने बाटो खुला भएको छ ।
भारतमा देखिएको कोरोना संक्रमणको दोस्रो लहरसँगै भारतभर खोप कार्यक्रमलाई पनि तीव्र गतिमा बढाउन दबाब बढिरहेको अवस्थामा त्यहाँको सरकारले यस्तो निर्णय गरेको हो । भारत सरकारलेसार्वजनिक गरेको विज्ञप्तिमा कोरोना खोप अभियानलाई गति दिन विश्वको सबैभन्दा राम्रो खोपको प्रयोग गरिने उल्लेख छ ।
विश्वको दोस्रो ठूलो जनसंख्या भएको भारतमा अहिलेसम्म करिब ३ प्रतिशत जनसंख्याले मात्र पूरा डोज कोरोना खोप लगाएका छन् । यो संख्या विश्वका सबैभन्दा धेरै कोरोना संक्रमण फैलिएका १० मुलुकमा सबैभन्दा कम हो । यसअघि सरकारले कुनै पनि विदेशी खोपको परीक्षण स्थानीयरुपमा नभएसम्म त्यसलाई मान्यता दिन नसकिने बताएको थियो ।
किन हट्यो भारत आफ्नो निर्णयबाट पछि ?
भारतमा कोरोना खोप अभियान सुरु हुँदै गर्दा प्रधानमन्त्री नरेन्द्र मोदीले कोरोना खोप स्थानीयरुपमा विकास गर्दै ‘आत्मनिर्भर भारत’ कार्यक्रमलाई अघि बढाउने बताएका थिए । त्यतिमात्र होइन, विश्वलाई नै भारतले खोप दिने उद्घोष पनि गरेका थिए । सो क्रममा भारतले करिब ६ करोड डोज कोरोना खोप अनुदान वा बिक्रीमार्फत निर्यात पनि गरेको थियो । तर, अहिले भने अवस्था फेरिएको छ ।
भारतमा कोरोनाको दोस्रो लहर फैलिएसँगै भारतका विभिन्न राज्यमा खोप अभावको समाचार आएको थियो । साथै मागअनुसारको आपूर्ति गर्न नसकेको कारण सबैभन्दा ठूलो खोप उत्पादक सेरम इन्स्टिच्युटका सीईओ अदार पूनावालाले आफूलाई धम्की आइरहेको एक अन्तर्वार्तामा बताएका थिए ।
खोपकै विषयलाई लिएर भारतमा सरकारको पनि आलोचना भइरहेको छ । आलोचनाका बीच भारतका वातावरणमन्त्री प्रकाश जावडेकरले शुक्रबार डिसेम्बरसम्म खोप अभियान पूरा हुने बताएका छन् ।
उनले सो अवधिसम्ममा भारतले २ अर्ब १६ करोड डोज कोरोना खोप मानिसहरुलाई लगाउने बताएका हुन् । यद्यपि भारतमा स्थानीयरुपमा उत्पादन भइरहेका खोपको माध्यमबाट उक्त लक्ष्य पूरा हुने सम्भावना छैन । त्यसैले भारतले अन्ततः विदेशी खोपलाई स्थानीयरुपमा परीक्षण नगरीकन नै अनुमति दिने निर्णय गरेको हो ।
भारतले गर्ला त निर्यात ?
विदेशी खोपलाई भारतमा अनुमति दिएसँगै भारतले स्थानीय खोपलाई निर्यातको लागि अनुमति दिन सक्ने आशा पनि देखिएको छ ।
यद्यपि महत्वाकांक्षी लक्ष्य र चुनौतीपूर्ण बनेको कोरोना संक्रमण नियन्त्रणका लागि भारतले छिटै नै निर्यातलाई अनुमति दिने सम्भावना कम रहेको जानकारहरुले बताएका छन् । भारतको सेरम इन्ष्टिच्युट अफ इन्डियाले हालै मात्र यस वर्षको अन्तिमबाट मात्र कोरोना खोप निर्यात हुन सक्ने बताएको छ ।
अहिले भारतमा अनुमति पाएको फाइजरले जुलाइदेखि अक्टोबरसम्ममा पाँच करोड दिने अपेक्षा गरिएको छ । मोडेर्नाले भने आगामी वर्षसम्ममा आफ्नो खोप भारतलाई दिन सक्ने भारतीय सञ्चारमाध्यमहरुले उल्लेख गरेका छन् । त्यसैले भारतमा कम्तीमा एक महिनाअघि अहिले देखिएको कोरोना खोपको अभाव तथा माग कम हुने अवस्था देखिँदैन ।
प्रतिक्रिया दिनुहोस
एजेन्सी
मंगलबार, १८ जेठ २०७८, १६ : ११
लेखकबाट थप
सम्बन्धित समाचारहरु
हावाबाट कोरोना फैलिएको विश्व स्वास्थ्य संगठनको स्विकारोक्ति
कोरोना भाइरसविरुद्धको खोप विसर्जन गरिँदै
नेपालमा कोभिडको नयाँ भेरियन्ट नभित्रिएको स्वास्थ्य मन्त्रालयको भनाइ
भारतको ११ राज्यमा फैलियो कोरोना भाइरसको नयाँ भेरियन्ट
भारतमा भेटियो कोरोनाको नयाँ भेरियन्ट
कोरोना भाइरसविरुद्धको ४० लाख मात्रा डोज खोप खेर जाँदै