कोरोनाको संक्रमणबाट पत्रकार कार्कीको निधन

काठमाडौँ । कोरोना भाइरसको संक्रमणबाट पत्रकार शान्तिराम कार्कीको ३४ वर्षको अल्पायुमै निधन भएको छ । नेपाल पत्रकार महासङ्घ च्यानल नेपाल प्रतिष्ठान शाखाका अध्यक्ष  रहेका कार्कीको काठमाडौँको स्वयम्भूस्थित मनमोहन मेमोरियल अस्पतालमा उपचारको क्रममा निधन भएको हो । 

गत वैशाख १९ गते सङ्क्रमण पुष्टि भएपछि सोही दिनदेखि उनी उपचारत रहेका थिए ।  वैशाख २३ गतेदेखि भेन्टिलेटरमा राखी उनको उपचार भइरहेको थियो । झापा निवासी कार्की विगत डेढ दशकदेखि काठमाडौँमा रही पत्रकारितामा सक्रिय थिए। जनता टाइम्स डटकमका सम्पादक कार्की प्रेस चौतारी नेपालको केन्द्रीय सदस्य थिए । 

प्रेस चौतारीका अध्यक्ष गणेश बस्नेतले कार्कीको निधनबाट स्तब्ध भएको उल्लेख गर्दै श्रद्धाञ्जलि व्यक्त गरेका छन् ।नेपाल पत्रकार महासङ्घका महासचिव रोशन पुरीले विज्ञप्ति जारी गरी स्वर्गीय पत्रकार कार्कीप्रति श्रद्धाञ्जलि अर्पण गरेका छन् । कोरोनाकै कारण हालसम्म १३ पत्रकारको निधन भएको छ भने ७५० भन्दा बढी पत्रकार सङ्क्रमित भएका छन् ।