चितवन । भरतपुर महानगरपालिकाको अगुवाईमा यहाँ स्थापना गरिएको भरतपुर कोरोना विशेष अस्थाई अस्पताल उपयोगी बन्दै गएको छ । कोरोनाको संक्रमण बढ्दै गएपछि पोजेटिभ देखिएकाहरुका लागि राख्न कोरोना अस्पताल उपयोगी बनेको हो ।
यस अस्पतालमा चितवन र नवलपरासी (वर्दघाट सुस्ता पूर्व)का कोरोना संक्रमित राखिंदै आएको छ । भरतपुर महानगरपालिकाले ७२ घण्टा भित्र सो अस्पताल स्थापना गरी वैशाख १ गतेबाट सञ्चालनका लागि भरतपुर अस्पताललाई हस्तान्तरण गरेको थियो । सो अस्पताल चैत ७ गतेबाट सञ्चालनमा आएको हो ।
जिल्लामा कोरोना नियन्त्रण कार्यदल गठन गरी कार्यबिधि बनाएर अस्पताल सञ्चालनमा ल्याइएको हो । हाल सो अस्पताल हेर्दै आउनुभएकी डा. शान्ति भूर्तेलका अनुसार आज अस्पतालमा दुई जना चितवन र दुई जना नवलपरासी (वर्दघाट सुस्ता पूर्व)का संक्रमित रहेका छन् । भूर्तेलले नयाँ ठाउँ भएकाले अझै केही कुराहरु सुधार गर्नुपर्ने देखिएको बताउनुभयो । यद्यपि छुट्टै अस्पताल भएकाले भरतपुर अस्पतालमा संक्रमित राख्नु नपर्दा अन्य बिरामीको सहज उपचार गर्न पाइएको बताउनुभयो ।
स्वास्थ्य कार्यालय नवलपरासीका प्रमुख केशव चापागाईंले भरतपुरमा कोरोना अस्पताल स्थापना भएकै कारण सहज भएको बताउनुभयो । प्रादेशीक हिसावले बिरामीहरु पठाउने ठाउँ पोखरा भए पनि भौगोलिक हिसाबले चितवन धेरै सहज भएको बताउनुभयो । नवलपरासीमा सघन उपचार कक्ष र भेन्टीलेटरहरु छैनन् ।
भरतपुर अस्पतालका प्रमुख मेडिकल सुपरिटेण्डेन्ट डा. श्रीराम तिवारीका अनुसार नेपाल सरकारले तह एक अर्थात साधारण लक्षण भएका बिरामी राख्न सोही अस्पताललाई तोकेको छ । तह दुई अर्थात मध्यम र जटिललाई भरतपुर अस्पताल र कडा भएकालाई, त्रिवि शिक्षण अस्पताल, नेपालगञ्ज मेडिकल कलेज र वीपि कोईराला स्वास्थ्य विज्ञान प्रतिष्ठान धरान तोकेको तिवारी बताउनुहुन्छ ।
भरतपुर अस्पताल विकास समितिका अध्यक्ष डा. भोजराज अधिकारीले भरतपुर महानगरपालिका प्रमुख रेनु दाहालको सक्रियतामा कोरोना अस्पताल स्थापना भएकै कारण आज दुवै जिल्लाका संक्रमित राख्ने ठाउँ बनेको बताउनुभयो । महानगरको दुरदर्शी सोचका कारण भरतपुर अस्पतालमा संक्रमित राख्नु नपरेको उहाँको भनाइ छ । अधिकारीले गरिबको उपचार गर्ने भरतपुर अस्पतालमा अहिले संक्रमित राख्नु नपर्दा चितवन र छिमेकी जिल्लाका बिरामीको उपचारमा सहज बनेको बताउनुभयो ।
भरतपुर महानगरपालिका प्रमुख रेनु दाहालले नेपालमा कोरोना देखिना साथ समस्या आउन सक्ने भएकाले सबैको साथ र सहयोगबाट कोरोना अस्पतालको स्थापना गरिएको बताउनुभयो । उहाँले नेपालमा नै पहिलोपटक छुट्टै कोरोनाको उपचार गर्ने अस्पताल निर्माण गर्न सकिन्छ भन्ने उदाहारण भरतपुर महानगरले दिएको बताउनुभयो ।
संक्रमण बढ्दै गएपछि कोरोना अस्पतालको थप महत्व हुँदै गएको उहाँको भनाई छ । अस्पताल स्थल वस्ति नभएका ठाउँमा भएकाले जोखिमको सम्भावना न्यून छ । सो अस्पतालमा ७० शैया रहेका छन् । महानगरको नेतृत्वमा यहाँका सरकारी, निजी अस्पताल र अन्य संघसंस्थाको सहयोगमा कोरोना अस्पतालको स्थापना गरिएको हो । सो अस्पतालमा हालसम्म कोरोना संक्रमित राख्ने, स्वाव संकलन गर्ने, आईसोलेसन एव क्वारेन्टाईनको रुपमा प्रयोग गरिंदै आएको भए पनि अब कोरोना संक्रमित मात्र राखिने भएको छ ।
प्रतिक्रिया दिनुहोस
सफल खबर संवाददाता
शुक्रबार, ०९ जेठ २०७७, १३ : १६
लेखकबाट थप
सम्बन्धित समाचारहरु
हावाबाट कोरोना फैलिएको विश्व स्वास्थ्य संगठनको स्विकारोक्ति
कोरोना भाइरसविरुद्धको खोप विसर्जन गरिँदै
नेपालमा कोभिडको नयाँ भेरियन्ट नभित्रिएको स्वास्थ्य मन्त्रालयको भनाइ
भारतको ११ राज्यमा फैलियो कोरोना भाइरसको नयाँ भेरियन्ट
भारतमा भेटियो कोरोनाको नयाँ भेरियन्ट
कोरोना भाइरसविरुद्धको ४० लाख मात्रा डोज खोप खेर जाँदै