बालकविता : गट्टा खेल्ने साथी

- रमेशचन्द्र घिमिरे

किन घुर्की लगाउँछ्यौ
मर्काएर घाँटी ?
खोजी आऊ अनिता
गट्टा खेल्ने साथी

गट्टा फिँजाई भुईंमा
टाउको कर्काई
खेलिन् साथी निताले
ओर्काई फर्काई

एक् टिप्पे र दुई टिप्पे
अनि अचारचाटी
खेल्दैछु म हेर्दै जाऊ
गट्टा खेल्ने साथी

खेल्दाखेल्दै थाकेँ म
तिम्लाई पालो दिम् कि ?
एक् छिनपछि खेल्ने हो
मैले इम्की-छिम्की

आँखा छली सुनिता
नबन है बाठी
झेल् नगरी खेल्न आऊ
गट्टा खेल्ने साथी

घोडे गुफा खेलौँ है
खेलौँ गट्टाच्यापी
ढ्यापु, च्यापु, घर् लिपी
दुल्के, पन्जाछापी

गीता अनि बिनिता
मनिता छिन् जाती
भोलि फेरि जुटौँ है
गट्टा खेल्ने साथी !