किन टुक्रयाउदैं छन् काँग्रेस सभापति देउवाले केन्द्रिय विभाग, थप ९ विभाग बनाउने तयारी

काठमाडौं । प्रमुख प्रतिपक्ष काँग्रेसका सभापति शेरबहादुर देउवा निर्वाचित भएको चार वर्ष पुगेको छ । विधानको ब्यवस्था अनुसार नियमित महाधिवशेन गरेको भए काँग्रेस महाधिवशेन निर्धारित समय माघमा हुन्थ्यो भने काँग्रेसका नेता कार्यकर्ताहरु यतिबेला त्यसैको घनिभूत तयारीमा जुटिरहेका हुन्थे । तर, काँग्रेसको महाधिवशेन विद्यानमा ब्यवस्था भएको विशेष ब्यवस्थाका कारण महाधिवेशन अर्काे एक वर्ष पछि धकेलिईसकेको छ ।

निर्वाचित भएको ४ वर्ष सम्म देउवाले विधान अनुसारको केन्द्रीय विभाग गठनमा खासै चासो देखाएनन् । नेता कार्यकर्ताको कार्य विभाजनमा पनि उत्तिसारो ध्यान दिएनन् । विधानमा काँग्रेसको २८ केन्द्रीय विभाग हुने उल्लेख छ । विधानकै ब्यवस्थालाई मान्ने हो भने महाधिवशेनवाट नयाँ निर्वाचित कार्यसमिति आएको दुई महिना भित्र विभागहरु गठन गरिसक्नुपर्ने थियो । तर सभापति देउवाले त्यसलाई टार्दै आए । 

खासगरी पार्टीभित्र देखापरेको त्रिपक्षिय धारका कारण उनले आफ्नो धार बलियो बनाउन र आफु इतरका बरिष्ठ नेता रामचन्द्र पौडेल सहित, कोइराला परिवारको धार, नेता कृष्णप्रसाद सिटौलाको तेश्रो धारलाई कमजोर बनाउन पार्टीका विभागहरु गठनमा खासै चासो दिएनन् । तर, अब महाधिवशेन लक्षित कार्यक्रममा जुट्नुपर्ने देउवा अहिले विभाग गठनमा चासो दिन थालेको काँग्रेसका एक नेताले बताए । उनले अहिले आफ्नो पक्षका धेरै भन्दा धेरै नेतालाई काम दिने योजनाका साथ केन्द्रीय विभाग टुक्रयाउने र नयाँ ९ ओटा विभाग थप्ने प्रस्ताव पार्टीमा राखि सकेका छन् ।

काँग्रेसमा रहेको २८ विभागलाई देउवाले अहिले ३७ ओटा बनाउने तयारी थालेका छन् । काँग्रेसमा अहिलेसम्म नीति अध्ययन प्रतिष्ठान बाहेक कुनै पनि विभाग गठन हुन सकेको छैन । देउवाका स्वकिय सचिव भानु देउवाले विधानको ब्यवस्था अनुसार नै आवश्यकताका आधारमा ठूला विभागलाई फुटाएर नयाँ विभाग थप्ने तयारी सभापति देउवाले गरेका हुन् । प्रत्येक विभागमा बढीमा ५१ जना सम्म सदस्य रहने काँग्रेस विधान र नियमावलीमा व्यवस्था छ ।

सबै विभागले पूर्णता पाएको भए कम्तीमा १५ सय नेता कार्यकर्ताले पार्टी जिम्मेवारी पाउथें । तर ४ वर्षसम्म विभाग गठन नहुंदा पार्टी काम लथालिंग भएको कतिपय नेताहरुको टिप्पणी छ । अहिले कायम रहेको कुन –कुन विभागलाई देउवाले टुक्राउन खोजेका हुन् भन्ने अहिले सम्म वाहिर सार्वजनिक गरेका छैनन । तर उनले आफु निकट नेताहरुसँग यस बारेमा परामर्श भने गरेका छन् । १४ मंसिरको उपचुनाव लगत्तै विभागलाई टुक्रयाउने देउवाको योजना रहेको उनी निकट नेताहरु बताउँछन् ।