सांसद स्वागत प्रकरणबारे चण्डेश्वरी माविको स्पष्टीकरण, पूर्वनिर्धारित कार्यमा व्यस्त रहेको दाबी

काठमाडौँ । ओखलढुंगास्थित चण्डेश्वरी माध्यमिक विद्यालयले राष्ट्रिय स्वतन्त्र पार्टी (रास्वपा) का सांसद विश्वराज पोखरेलसँग सम्बन्धित घटनाबारे औपचारिक स्पष्टीकरण सार्वजनिक गरेको छ ।

सांसदलाई विद्यालय प्रवेशका क्रममा आवश्यक स्वागत नभएको विषयलाई लिएर उठेका प्रश्नपछि विद्यालय प्रशासनले धारणा सार्वजनिक गरेको हो ।

सामाजिक सञ्जालमा सांसद पोखरेलले प्रधानाध्यापक सन्तबहादुर मगरलाई गेटमा स्वागत गर्न नआएको भन्दै असन्तुष्टि व्यक्त गरेको भिडिओ सार्वजनिक भएपछि उक्त घटना चर्चामा आएको थियो । पछि सांसद पोखरेलले आफ्नो व्यवहारप्रति गल्ती स्वीकार गर्दै माफी समेत मागेका थिए ।

यसैबीच विद्यालयका प्रधानाध्यापक मगर र विद्यालय व्यवस्थापन समितिका अध्यक्ष टेकबहादुर बुढाथोकीले संयुक्त रूपमा विज्ञप्ति जारी गर्दै घटनाको विवरण सार्वजनिक गरेका छन् ।

विज्ञप्तिमा उल्लेख गरिएअनुसार सांसद पोखरेल विद्यालयको शैक्षिक अवस्था तथा समस्याबारे जानकारी लिन पूर्वनिर्धारित कार्यक्रम अनुसार पुगेका थिए । सो समयमा प्रधानाध्यापक मगर आफ्नै कार्यकक्षमा विद्यालयको आवश्यक माग तथा समस्यासम्बन्धी विवरण तयार गर्ने कार्यमा व्यस्त रहेको जनाइएको छ ।

विद्यालय प्रशासनका अनुसार मागपत्र तयारीकै क्रममा व्यस्त रहँदा बाहिर आउन केही ढिलाइ भएको र सोही बीचमा सांसद विद्यालय परिसरबाट प्रस्थान गरिसकेको जानकारी प्राप्त भएको उल्लेख गरिएको छ ।