आईपीयू महासभामा अध्यक्ष दाहालद्वारा जलवायु न्याय र युवा सशक्तीकरणमा विश्व सहकार्यको आह्वान

काठमाडौँ । राष्ट्रिय सभा अध्यक्ष नारायणप्रसाद दाहालले अन्तर व्यवस्थापिका संघ (आईपीयू) को १५२ औँ महासभामा सम्बोधन गर्दै जलवायु परिवर्तन, युवा सहभागिता र समावेशितासहितका विश्वव्यापी मुद्दामा संयुक्त पहल आवश्यक रहेको बताएका छन्।

टर्कीको इस्तानबुलमा आयोजित महासभामा उनले विश्व समुदायलाई युवा सशक्तीकरण, सामाजिक समावेशिता र जलवायु न्यायका विषयमा साझा दृष्टिकोण बनाउन आग्रह गरे।

उनका अनुसार वर्तमान अन्तर्राष्ट्रिय परिस्थितिमा भूराजनीतिक तनाव, द्वन्द्व, जलवायु संकट, आर्थिक असमानता र युवा बेरोजगारीजस्ता समस्या परस्पर जोडिएका छन्, जसको समाधानका लागि समन्वित र दीर्घकालीन नीति आवश्यक छ।

अध्यक्ष दाहालले महासभाको ‘आशाको संवर्द्धन, शान्तिको सुनिश्चितता र भावी पुस्ताका लागि न्याय’ भन्ने मूल ध्येय वर्तमान विश्व परिवेशमा अझ सान्दर्भिक रहेको उल्लेख गर्दै नीति निर्माणमा दीर्घकालीन दृष्टिकोण आवश्यक हुने बताए।