कांग्रेस कार्यसम्पादन समितिको बैठक बस्दै, उम्मेदवार टुंग्याइने

काठमाडौ । उपनिर्वाचनका लागि उम्मेदवारको टुंगो लगाउन नेपाली कांग्रेसको कार्यसम्पादन समिति बैठक बुधबार पनि बस्दैछ ।

मंगलबारको बैठक निष्कर्षविहीन बनेपनि बुधबार पुनः बस्न लागेको हो । कांग्रेस सभापति शेरबहादुर देउवाले बैठकमा इलाम–२ मा डम्बर खड्का र बझाङको प्रदेशसभा निर्वाचन क्षेत्र १ मा अभिषेक सिंहलाई उम्मेदवारका रूपमा प्रस्ताव गरेका छन् । तर,  सभापति देउवाको उक्त प्रस्तावमा इतरपक्षले असहमति राखेको बताइएको छ ।  

इतर पक्षबाट इलाम— २ मा भेषराज आचार्य र बझाङमा जगत जोशीको नाम आएको छ ।  

कांग्रेस प्रवक्ता प्रकाशशरण महतले दिउँसो २ बजे बैठक बोलाइएको र त्यसपछि संसदीय बोर्डको बैठक बसेर निर्णय अनुमोदन गरिने बताए ।