एनआरएनएको उपाध्यक्षमा डा. शर्माले उम्मेदवारी दिने

काठमाडौँ । गैरआवासीय नेपाली संघ (एनआरएनए) का उपाध्यक्ष डा. हेम राज शर्माले फेरि सोही पदमा उम्मेदवारी दिने भएका छन् । 

डा. शर्माले बुधवार एक विज्ञप्ति जारी गर्दै संघको अभियान र समग्र गैरआवसीय नेपालीको हितमा हुने विश्वास लिँदै आम सहमतिको लागि मार्गप्रशस्त गर्न आगामी कार्यकालका लागि पुनः उपाध्यक्ष पदमा नै उम्मेदवारी दिने निचोडमा पुगेको बताए । उनले यसअघि संघको अध्यक्ष पदमा उम्मेदवारी दिने घोषणा गरेका थिए ।

विज्ञप्तिमा एनआरएनए जस्तो सामाजिक संस्थामा तछाड–मछाड गरेर नेतृत्व लिनु भन्दा धैर्यताका साथ आपसी समझदारी, सहकार्य र सहमतिले अगाडि बढ्नु नै उपयुक्त हुने उल्लेख छ ।  

डा. शर्माले विज्ञप्तिमा प्रविधिको प्रयोग गरी संस्थाको रुपान्तरण  र सबैको साझा, सवल र स्मार्ट एनआरएनए  निर्माण  गर्ने अभियानलाई थप सशक्त र प्रभावकारी रुपमा अघि बढाउने प्रतिबद्धता जनाएका छन् । शर्माले संस्थालाई रिब्राण्डिङ गर्ने स्पष्ट मार्गचित्रसहित प्रतिनिधि समक्ष आउने बताए ।