सवारी दुर्घटनामा तीन जनाको मृत्यु

काठमाडौँ । देशका विभिन्न स्थानमा भएका सवारी दुर्घटनामा परी पछिल्लो २४ घण्टामा ३ जनाको मृत्यु भएको छ । कास्कीको पोखरा महानगरपालिका-८ सभागृह चोकस्थित सडकमा ग.२२ प ७९५१ नम्बरको स्कुटरलाई बागमती प्रदेश ०३-००१- क ००२१३ नम्बरको ट्रकले सोमबार दिउँसो ठक्कर दिँदा स्कुटर चालक तनहुँ घर भएकी २० वर्षीया वर्षा कुमालको मृत्यु भएको छ । 

दुर्घटनामा गम्भीर घाइते भएकी उनको गण्डकी मेडिकल कलेजमा उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ ।यता बाराको कलैया उपमहानगरपालिका-१८ स्थित सडकमा प्र.२-०३-००७ नम्बरको मोटरसाइकल अनियन्त्रित भई सोमबार राति दुर्घटना हुँदा चालक प्रसौनी गाउँपालिका-१ बस्ने ३२ वर्षीय रबी गुप्ताको मृत्यु भएको छ । दुर्घटनमा गम्भीर घाइते भएका उनको एलएस न्यूरो अस्पताल प्रसौनी हुँदै थप उपचारको लागि एनएमसी अस्पतालतर्फ लैजाने क्रममा बाटोमै मृत्यु भएको हो । 

यस्तै मोरङको उर्लाबारी नगरपालिका-४ स्थित सडकमा प्र.१-०२-०५२ प ४२४१ नम्बरको मोटरसाइकललाई प्र.३-००१ क ००९५ नम्बरको टिपरले मंगलबार बिहान ठक्कर दिँदा मोटरसाइकल चालक सप्तरी तिरहुत गाउँपालिका-५ बस्ने २८ वर्षीय निरज यादवको मृत्यु भएको छ । दुर्घटनामा गम्भीर घाइते भएका उनको मदन भण्डारी ट्रमा सेन्टर मंगलबारेमा उपचारको क्रममा मृत्यु भएको हो ।  टिपर चालकलाई प्रहरीले नियन्त्रणमा लिएको हो । दुर्घटनाका सम्बन्धमा प्रहरीले थप अनुसन्धान गरिरहेको छ ।