माओवादीले कारबाही गरेका मेयरलाई काममा रोक नलगाउन सर्वोच्चको आदेश

सफल खबर संवाददाता

मंगलबार, १५ असार २०७८, १९ : ०८
माओवादीले कारबाही गरेका मेयरलाई काममा रोक नलगाउन सर्वोच्चको आदेश

काठमाडौँ । नेकपा माओवादी केन्द्रले कारबाही गरेका दुई मेयरलाई काममा रोक नलगाउन सर्वोच्चले आदेश दिएको छ । सर्वोच्च अदालतले नेकपा (माओवादी केन्द्र) बाट निर्वाचित भइ दल त्याग गरेर नेकपा (एमाले) प्रवेश गरेका दुई मेयरलाई काम गर्न अन्तरिम आदेश दिएको हो ।

माओवादी त्याग गरी एमाले प्रवेश गरेका रौतहटको मौलापुर नगरपालिकाकी मेयर रीनाकुमारी साह र कटहरिया नगरपालिकाका मेयर सियाराम कुशवाहलाई कामकाज गर्न दिनका लागि भन्दै सर्वोच्च अदातलले अन्तरिम आदेश दिएको हो । न्यायाधीश कुमार चुडालको एकल इजलासले मंगलबार साह र कुशवाहाको रिट निवेदनमाथि सुनुवाइ गर्दै उक्त आदेश दिएको हो ।

माओवादीको वैशाख १३ गते बसेको केन्द्रीय समितिको बैठकको निर्णयको आधारमा निर्वाचन आयोगले असार ९ गते साह र कुशवाहलगायत जनप्रतिनिधिलाई दल त्याग सम्बन्धी कानुन अनुसार पदमुक्त भएको निर्णय गरेको थियो । पदमुक्त भएको जानकारी आयोगले उनीहरूलाई असार ११ गते दिएको थियो ।