बेलायतमा पुनः कोरोना संक्रमितको संख्या बढ्दै

एजेन्सी । बेलायतमा कोरोना संक्रमण दर तीव्र रुपमा बढ्दै गइरहेको छ । शुक्रबार सार्वजनिक तथ्यांक अनुसार संक्रमण दर गएको तीन महिनायताकै उच्च कायम रहेको छ ।

अघिल्लो हप्ताको तुलनामा संक्रमण दर ४९ प्रतिशतले बढेको छ । पछिल्लो २४ घन्टामा ६ हजार दुई सय ३८ जना नयाँ संक्रमित थपिएको ‘डिपार्टमेन्ट अफ हेल्थ एण्ड सोशल केयर’ ले जनाएको छ । दैनिक संक्रमण दर तीनहजार भन्दा कम रहँदै आएपनि पछिल्लो एक हप्तामा यो संख्या निरन्तर बढ्दै गएको छ ।नयाँ संक्रमितसंगै बेलायतम कोरोना संक्रमितको संख्या ४५ लाख छ हजार नाघेको छ ।

यसैगरी बितेको २४ घन्टामा ११ जना कोरोना संक्रमितको ज्यान गएको स्वास्थ्य विभागले जनाएको छ । हालसम्म बेलायतमा कोरोनाका कारण ज्यान गुमाउनेको संख्या एक लाख २७ हजार ८२३ पुगेको छ ।गत मनागल्बार बेलायतमा कोरोनाबाट मृत्यु हुने संख्या महामारीशुरु भएयता पहिलो पल्ट शून्यमा झरेको थियो ।

पछिल्लो तथ्यांक अनुसार बेलायतमा हालसम्म  छ करोड ६७ लाख ४९ हजार ६३८ डोज खोप वितरण भइसकेको छ । जसमध्ये तीन करोड ९९ लाख ४९ हजार ६९४ जनाले पहिलो डोज र दुई करोड ६७ लाख ९९ हजार ९४४ जनाले दोस्रो डोज लगाएका छन् ।