राष्ट्रियसभा चुनावको उम्मेदवारले आज मनोनयन दर्ता गर्दै

काठमाडौं । राष्ट्रिय सभाका १८ सिटका लागि हुन लागेको चुनावमा उम्मेदवारहरुले आज मनोनयनपत्र दर्ता गराउदैछन् । ९ माघमा हुने निर्वाचनमा उम्मेदवार मनोनयनका लागि निर्वाचन आयोगले आज कार्यतालिका तोकेको छ । आयोगले उम्मेदवार दर्ताका लागि बिहान १० वजे देखि दिउँसो ३ बजे सम्मका लागि समय तोकेको छ ।

सातैं प्रदेशमा उच्च अदालत रहेको जिल्लामा आयोगले निर्वाचन अधिकृतको कार्यालय स्थापना गरेको छ । निर्वाचनमा काँग्रेस र समाजवादी तथा नेकपा र राजपा बीच चुनावी तालमेल भएको छ । जसअनुसार, राजपा र समाजवादी पार्टीले भने दुई दुई स्थानमा मात्र प्रतिस्पर्धा गर्दै छन् भने अन्य १६ स्थानमा काँग्रेस र नेकपाका उम्मेदवारले चुनावी प्रतिस्पर्धा गर्दैछन् ।

नगरपालिका, गाँउपालिकाका अध्यक्ष, उपाध्यक्ष, प्रदेश सभाका सांसदहरुको फरक मतभारका आधारमा हुने निर्वाचनमा नेकपा र राजपा गठबन्धन विजयी हुने सम्भावना अधिक छ । प्रदेश २ को अन्य समुहमा हुन लागेको चुनावमा भने एकै परिवारका दुई दाजुभाई चुनावी प्रतिस्पर्धा गर्न लागेका छन् ।  

उनीहरु अलग अलग राजनीतिक दलका तर्फवाट चुनावी प्रतिस्पर्धामा उत्रन लागेका हुन् । सप्तरीको बोदेबर्साइन नगरपालिकाका अनिरुद्र सिंह यादव र उनका भाइ मृगेन्द्र सिंह यादवबीच प्रतिस्पर्धा हुन लागेको हो ।

राष्ट्रिय जनता पार्टी (राजपा) नेपालले मृगेन्द्रलाई र समाजवादी पार्टीले अनिरुद्रलाई प्रदेश २ को अन्य समुहवाट चुनावी प्रतिस्पर्धामा उतारेको हो । राजपाले मृगेन्द्रलाई शनिबार दिउँसै उम्मेदबार बनाउने निर्णय गरे पनि अनिरुद्रलाई शनिबार राति समाजवादी पार्टीले उम्मेदबार चयन गरेको थियो । २०७० सालको संविधानसभा निर्वाचनमा पनि दुवैले सप्तरी क्षेत्र नम्बर ४ बाट फरक–फरक दलबाट प्रतिस्पर्धा गरेका थिए ।

मृगेन्द्र तत्कालीन मधेशी जनअधिकार फोरम लोकतान्त्रिकबाट र अनिरुद्र मधेशी जनअधिकार फोरमबाट उम्मेदबार बनेका थिए । तर, दुवै पराजित भए । सो क्षेत्रबाट नेपाली कांग्रेसका सुरेन्द्र यादव निर्वाचित भएका थिए ।

राष्ट्रिय सभाको १ सिट भने सरकारको सिफारिसमा राष्ट्रपतिले मनोनित गर्ने कोटा छ । अर्थमन्त्री डा. युवराज खतिवडाको सिट पनि खाली हुदैंछ । त्यसमा भने निर्वाचन गर्नुपर्ने छैन् । सरकारको सिफारिसमा राष्ट्रपतिले मनोनित गर्ने सम्वैधानिक ब्यवस्था अनुसार हुनेछ ।
 
राजनीतिक दलहरुले उम्मेदवारी दर्ताका लागि आफनो तयारी पूरा भईसकेको जनाएको छ । नेकपाका महासचिव विष्णु पौडेलले सफलखबरसँग भने, –‘हाम्रो तयारी पूरा भईसकेको छ, उम्मेदवार पार्टीले बैठक बसेर चयन गरिसकेको छ, आज सम्बन्धित उम्मेदवारहरुले उम्ेमदवारी दर्ता गराउनुहुनेछ । प्रदेश २ को ४ सिटमा हुन लागेको निर्वाचनमा हामी दुई सिटमा राजपालाई सघाउनेछौं, राजपाले हामीलाई २ सिटमा सघाउनुहुनेछ । अन्य १६ स्थानमा नेकपाका उम्मेदवार नै चुनावी प्रतिस्पर्धामा जादैहुनुहुन्छ ।’
 
काँग्रेस प्रवक्ता विश्वप्रकाश शर्माले पनि पार्टीले उम्मेदवार चयन गरिसकेको र त्यसका लागि आवश्यक तयारी भईसकेको प्रतिक्रिया दिए  । ‘काँग्रेसले कँहा कसलाई चुनाव लडाउने भन्ने तय गरिसकेको छ, उहाँहरुले आज उम्मेदवारी मनोनयन गर्दै हुनुहुन्छ । प्रदेश २ मा समाजवादीसँग दुई दुई सिटमा तालमेल गरेका छौं, सबै तयारी निर्वाचनको पूरा भएको छ,’ काँग्रेस प्रवक्ता विश्वप्रकाश शर्माले भने ।