बागमतीलाई ‘मानवताको प्रदेश’ घोषणा गर्छौ : मुख्यमन्त्री बानियाँ

हेटौँडा । बागमती प्रदेशका मुख्यमन्त्री इन्द्रबहादुर बानियाँले प्रदेशलाई ‘मानवताको प्रदेश’ घोषणा गर्ने बताएका छन् । उनले प्रदेशका १३ जिल्लामा सडक तथा सहयोगापेक्ष मानवहरूको व्यवस्थापन गरेर सरकारले ‘मानवताको प्रदेश’ घोषणा गर्ने बताए ।

हेटौँडामा आयोजित मानव सेवा आश्रमको १३ औँ वार्षिक साधारण सभालाई सम्बोधन गर्दै मुख्यमन्त्री बानियाँले मानव सेवा आश्रमको सेवालाई प्रदेशका सबै १३ जिल्लामा विस्तार गर्न सरकारले पूर्ण सहयोग गर्ने बताए । सडक–आश्रित, बेसहारा तथा असहाय मानिसहरूको उद्धार र संरक्षणमा मानव सेवा आश्रमको कार्य उत्कृष्ट रहेको उनले बताए ।

‘एउटा व्यक्तिले सत्य र मानवताको भावले निरन्तर काम गर्दा समाज र सरकारलाई नै घच्घच्याउन सक्दो रहेछ । हामी सरकारमा छौँ । हामीले चाहे धेरै गर्न सक्छौँ’ उनले भने- ‘यसअघि दुई वटा प्रदेशले सडक मानवमुक्त प्रदेश घोषणा गरिसकेको बुझेको छु । अब तेस्रो नम्बरमा बागमती प्रदेशले यथाशीघ्र ‘मानवताको प्रदेश’ घोषणा गर्नेछ । प्रदेशका सबै जिल्लामा सेवा विस्तार गर्ने अभियानमा सरकार साझेदार बन्नेछौँ । आवश्यकताअनुसार आश्रमका भवन तथा संरचना निर्माणमा सहयोग गर्न तत्पर छौँ ।’

समाजलाई कसरी राम्रो बनाउने, टुटेका मनहरूलाई कसरी जोड्ने भन्नेमा चिन्तन गर्नुपर्नेमा मुख्यमन्त्री बानियाँको आग्रह छ । सङ्घीय सरकार मातहतका खाली भवन आश्रमलाई उपलब्ध गराउने गरी प्रधानमन्त्री र सम्बन्धित मन्त्रीसँग पहल गर्ने उनले आश्वासन दिए ।