५१ शाखा अधिकृतको सरुवा(सूचीसहित)

काठमाडौं । बढुवा सिफारिस भएर संघीय मामिला तथा सामान्य प्रशासन मन्त्रालयको अतिरिक्त समूहमा रहेका प्रशासन सेवाका ३२ जना शाखा अधिकृत र लोक सेवा आयोगबाट सिफारिस भएका प्राविधिक सेवा र तथ्यांक सेवाका गरेर ५१ जना शाखा अधिकृतको पदस्थापन तथा सरुवा भएको छ । मन्त्रालयले सोमबार उनीहरुलाई विभिन्न निकायमा पदस्थापन तथा सरुवा गर्ने निर्णय गरेको हो ।

जसमा १० जना नेपाल इञ्जिनियरिङ सेवा, सिभिल इञ्जिनियरिङ समूह, जनरल उपसमूह अन्तर्गतका राजपत्रांकित तृतीय श्रेणीका इञ्जिनियर र ९ जना नेपाल आर्थिक योजना तथा तथ्यांक सेवा, तथ्यांक समूह अन्तर्गत राजपत्रांकित तृतीय श्रेणीका अधिकृतको रहेका छन् ।

मन्त्रालयको अतिरिक्त समूहमा रहेका ३२ जना प्रशासन सेवाका शाखा अधिकृतको पदस्थापन तथा सरुवा गर्दा २३ जनाको भूमि व्यवस्था, सहकारी तथा गरिवी निवारण मन्त्रालयमा सरुवा भएको छ भने ५ जनालाई विभिन्न जिल्ला समन्वय समितिमा पठाइएको छ ।

यस्तै ३ जनालाई विभिन्न गाउँपालिकाका प्रमुख प्रशासकीय अधिकृतको जिम्मेवारी दिइएको छ भने एक जनालाई अख्तियार दुरुपयोग अनुसन्धान आयोगमा पठाइएको छ । जसमा कमलबहादुर केसीलाई तनहुँको बन्दिपुर गाउँपालिका, थमनबहादुर रेग्मीलाई पर्वतको बिहादी गाउँपालिका र रामबाबु पौडेललाई धादिङको थाक्रे गाउँपालिकाको प्रमुख प्रशासकीय अधिकृतको जिम्मेवारी दिइएको हो ।