एनआरएनएको एकता भाँड्न जापान पुगे बद्री केसी

काठमाडौँ । गैरआवासीय नेपाली संघ (एनआरएनए) को एकताको प्रक्रिया सुरु भएकै बेला कार्यालय कब्जा गरेर गतिविधि गर्दै आएका बद्री केसी यतिबेला जापान पुगेका छन् । एकताका लागि सबैसँग हातेमालो गरेर अघि बढ्नुपर्नेमा उनी खलनायकको रुपमा अघि बढेका हुन् । 
जसअनुसार यतिबेला उनी एनआरएनए जापानले आयोजना गरेको कार्यक्रमका लाथि भन्दै जापान पुगेका छन् । तर, उनी जापान पुगेपनि नराम्ररी झड्का लाग्न पुगेको छ । प्रमुख अतिथि भनिएका उनी अनधिकृत अध्यक्ष भएकाले प्रमुख अतिथि नबनाइने भएको छ । यतिमात्रै होइन उनको सहभागिताले एनआरएनए जापानमात्रै नभएर नेपाली समुदाय नै विभाजित बनेका छन् । 

उनी एनआरएनए विरोधी रहेकाले कार्यक्रममै सहभागी गराउन दिन हुँदैन भन्नेहरु छन् भने सहभागी हुने नै भएपनि सामान्य अभियन्ताको हैसियतमात्रै दिनुपर्ने पक्षमा छन् । यही विवादका कारण आयोजकले प्रमुख अतिथि जापानी नागरिकलाई बनाएको छ । 

एनआरएनए उच्चस्तरीय समितिका सदस्य विनोद कुँवरले बद्री केसीले एकताका लागि वातावरण बनाउन सहयोग गर्नुपर्नेमा गलत समयमा जापान पुगेको प्रतिक्रिया दिए । उनले बद्रीले एकतामा साथ नदिए विश्वभरका नेपाली चुप लागेर नबस्ने भन्दै जापान गएर पनि समाजलाई भाँड्न नहुनेमा चेतावनी दिए । 

एनआरएनएका अर्का अभियन्ता गंगाधर गौतमले बद्रीको हर्कत गलत भएको बताए । ‘एनआरएनएमा पनि ओली राजजस्तो देखियो । बद्रीबाट अराजकता देखियो’, उनले भने, ‘इतिहासलmाई नै सिध्याउनका लागि रसियन पारा र हिसाबमा अधिनायक शैलीमा उनी अघि बढेका छन् । तर संघमा एकताको विकल्प नै छैन ।’

एनआरएनए दर्ता भएको परराष्ट्र मन्त्रालयले नै एकता गराउनु भनेर पूर्वअध्यक्ष शेष घलेलाई पत्र पठाएर प्रक्रिया अघि बढिसकेको अवस्थामा उनले एनआरएनए भाँड्न खोजेको गौतमको भनाइ छ ।  ‘स्वायत्त एनसीसीको कार्यक्रममा जापानमा पुगेर एनसीसीलाई नै विभाजित गराउन उनी लागेको देखिन्छ’, उनले भने ।  
यस्तै केसी पक्षका अभियन्ताहरुले भने आफूहरु नै आधिकारिक रहेको र एनआरएनए जापानको कार्यक्रममा जानु स्वाभाविक भएको बताएको छ । केसीसहित रोजिना राई र कृष्ण तिमल्सिना सो समूहबाट जापान गएका छन् । 
यता केही दिनअघि बेलायतबाट फर्किएका नयाँ कार्यसमितिका अध्यक्ष आरके शर्माले एकताको विकल्प नभएको बताउँदै बेलायतमा पनि यस्तै भावना पाएको बताएका छन् । उनले एनआरएनएमा कसैले एकपक्षीय ढंगले अघि बढ्न खोज्छ भने उसको हिसाबकिताव अभियन्ताले गर्ने बताए । 
एनआरएनएको तीन समूहलाई मिलाउन घलेले पहिलो बैठक राखिसकेका छन् भने थप प्रक्रिया अघि बढाउन गतिविधिहरु गरिरहेका छन् ।