‘लक्ष्मी सनराइज उत्सव’ योजना : उत्कृष्ट हुनेलाई ५० हजार पुरस्कार

काठमाडौं। लक्ष्मी सनराइज बैंकले तिहारको अवसरमा सामाजिक सन्देशमुलक अभियान ‘लक्ष्मी सनराइज उत्सव’ सार्वजनिक गरेको छ ।नेपाली समाजमा छोरीलाई लक्ष्मीको आगमनको रुपमा मनाउने संस्कारलाई उत्सवका रूपमा मनाउँदै यसलाई अझ व्यापक बनाउन क्याम्पेन सार्वजनिक गरिएको बैंकले जनाएको छ ।

अझै पनि कतिपय परिवारमा छोरा र छोरीबीच विभेद राख्ने सोचमा परिवर्तन ल्याउन यस अभियानमार्फत टेवा पुर्‍याउने बैंकको लक्ष्य रहेको छ ।

यस अभियानअन्तर्गत बैंकले छोरीलाई घरकी लक्ष्मी मानेर सम्मान गर्न प्रोत्साहन गर्दै आम नागरिकहरूले कसरी आफ्नो परिवारमा महिला सदस्यलाई लक्ष्मीको रुपमा अपनाएका छन् भन्ने कुरा भिडियोमार्फत उजागर गर्न आग्रह गरेको छ ।

यसरी भिडियो बनाएर सामाजिक सञ्जालमा राख्ने सहभागीहरू मध्ये उत्कृष्ट तीन (३) भिडियोलाई क्रमशः रु ५०,०००, ३०,००० र १५,००० नगद पुरस्कारबाट पुरस्कृत गरिने बैंकले जनाएको छ ।सहभागीहरूले भिडियो पोस्ट गर्दा बैंकलाई #laxmisunriseutsab ट्याग गरी ह्यास्ट्याग  पनि प्रयोग गर्नुपर्ने छ ।