साउदीको जेद्धामा ५५ नेपाली युवा अलपत्र

 आकर्षक रोजगारीको प्रलोभनमा साउदी अरब पुगेका ५५ जना नेपाली युवा अलपत्र परेका छन् । उनीहरू करीब ६ महिनाअघि त्यहाँ पुगेका थिए ।

काठमाडौँको गौरीघाटमा रहेको यात्रा एचआर सोलुशन प्रालिलाई प्रतिव्यक्ति १ लाख ७० हजारदेखि २ लाखसम्म बुझाएर साउदी अरबको जेद्धास्थित युनियन कन्याक्टर नामको कम्पनीमा भनेर गएकाहरु म्यानपावरले सम्झौतामा उल्लेख गरेको कम्पनी नभेटेपछि अलपत्र परेका हुन् ।

तीन महिना काम गरेकाहरुले पनि तलब नपाएको र पछिल्लो तीन महिनादेखि क्याम्पमै बसिरहेको उनीहरूले बताएका छन् । लामो समयदेखि कामविहीन भएर बस्नुपर्दा खानाको लागि पैसा नभएकोले कति दिन भोकै बस्नु परेको उनीहरूले दुखेसो पोखे ।

आफूहरूलाई सकुशल उद्धार गरी स्वदेश फर्कने वातावरण मिलाइदिन र म्यानपावरका सञ्चालकलाई कारबाही गरी क्षतिपूर्ति दिलाइदिन उनीहरूले नेपाल सरकार, श्रम मन्त्रालय, वैदेशिक रोजगार विभाग, नेपाली दूतावास लगायत सम्बन्धित निकायलाई आग्रह गरेका छन् ।

उद्धारका लागि विभिन्न निकायहरूलाई अनुरोध गरिरहेको भए पनि अहिलेसम्म कतैबाट पहल भएको छैन । जेद्धामा रहेको नेपाली महाबाणिज्य दूतावासका प्रतिनिधिहरुले पनि उनीहरुलाई भेटेर सहयोग गर्ने आश्वासन दिए तर पुरा गरेनन् ।

म्यानपावरको जवाफ यस्तो छ
पिडितहरुसँगको कुराकानीमा यात्रा सोलुशन प्रालिका प्रतिनिधि भनिएका इमान लामाले असभ्य भाषामा पहिले काम गरेको कम्पनीले पनि तलब दिएको र अहिले कामविहीन भएर बसेको बेला पनि तलब दिने बताएका छन् । म्यानपावरका सञ्चालक भनिएका दिनेश केसीलाई खबरहबले सम्पर्क गर्दा भने केही बोल्न चाहेनन् ।

उनले काम गर्न गएकाहरुलाई नियमित काम गर्न सुझाएका छन् । पिडितहरुले भने म्यानपावरका सञ्चालक दिनेश आफूहरुसँग कुरा गर्न समेत तयार नभएको उनीहरुको आरोप छ । म्यानपावरले सहयोग नगरेको कारण बाध्य भएर मिडिया जान परेको बताएका छन् ।

पछिल्लो केही दिनअघि समस्यामा परेको भिडियो बनाएर सामाजिक सञ्जाल फेसबुकमा हालेपछि खाद्यान्नलगायत राहत सामाग्री आउन थालेको उनीहरूले बताएका छन् ।

हातेमालो युवा क्लबको सहयोग 

जेद्धामा ५५ नेपाली युवा अलपत्र परेको जानकारी पाएपछि हातेमालो युवा क्लब टिमलगायत अन्य विभिन्न सहयोगी दाताहरुले राहत स्वरूप खाद्यान्न सहयोग गरिरहेका छन् ।

विदेश पुगेर समस्यामा पर्नुभन्दा जानु पूर्व नै काम गर्ने कम्पनी, सेवा सुविधा, आउन सक्ने चुनौती आदीबारे बुझेर मात्र गए यस्ता समस्या भोग्नु नपर्ने सरोकारवालाहरुले बताउँदै आएका छन्।