भोजपुरी फिल्म ‘रण’ मा नेपाली निर्देशकसँगै प्राविधिक टिम

काठमाडौं । छिमेकी मुलुक भारतको क्षेत्रीय भाषाको भोजपुरी फिल्म इन्डस्ट्रीमा नेपाली कलाकारहरुको उपस्थिति बाक्लिँदै गएको छ । कुनै बेला अभिनेता निखिल उप्रेती र विराज भट्टले हैकम जमाएको भोजपुरी फिल्ममा धेरै नेपाली कलाकारदेखि प्राविधिकसम्मले काम गरिसकेका छन् । यस्तैमा पर्छन्, निर्देशक चन्द्र पन्त । भोजपुरी फिल्ममा द्वन्द्व निर्देशक रुपमा भित्रिएका चन्द्रले ‘निरहुवा चलल लन्डन’ मार्फत निर्देशनमा डेब्यु गरे ।

त्यसपछि उनको व्यस्तता भोजपुरी फिल्ममा बढेको छ । उनले निर्देशन गरेको पछिल्लो फिल्म ‘रण’ को ट्रेलर यतिबेला लोकप्रिय बनिरहेको छ । भोजपुरी फिल्ममै सर्वाधिक ५० लाख भन्दा बढी पटक ट्रेलर हेरिएको छ । ‘नेपालीले काम गर्न पाउँदा सक्छन् भन्ने उदाहरण हो यो । यसको छायांकन टिम, पोष्ट प्रोडक्सन टिम, कोरियोग्राफी टिम नेपाली नै हुन् । नेपाली टिमले गरेको कामले भोजपुरी फिल्मनगरी नै तातिएको छ’ निर्देशक पन्तले भने ।फिल्ममा आनन्द ओझा, नरेन खड्का, काजल रागवानी, सिपी भट्ट, मनोज टाइगर, देव सिंह, अरुण कुमार मिश्र लगायतको अभिनय छ । फिल्मलाई नेपालका अर्जुन जिसीले सम्पादन गरेका हुन् भने साहिल खानले ट्रेलर काटेका हुन् ।

अरुण कुमार मिश्रले निर्माण गरेको फिल्मको गीतहरुमा भोजपुरीबाट कानु मुखर्जी र नेपालबाट गम्भीर विष्ट र रामजी लामिछानेको नृत्य निर्देशन रहेको छ । यो फिल्मलाई नेपाली फिल्मका द्वन्द्व निर्देशक चन्द्र पन्तले निर्देशन गरेका हुन् । फिल्ममा निर्देशक पन्तकै कथा र द्वन्द्व निर्देशन रहेको छ । उनले फिल्मको ट्रेलर मार्फत भोजपुरीलाई एक्सनमा नयाँ स्वाद पस्किएका छन् ।