स्थायी समिति बैठकमा प्रेस गर्ने प्रस्ताव लेख्दै नेकपा अध्यक्ष प्रचण्ड

काठमाडौं । नेकपा अध्यक्ष प्रचण्ड स्थायी समिति बैठकमा पेश गर्ने प्रस्ताव आज लेख्ने भएका छन् । २५ वैशाखमा काठमाडौंमा स्थायी समिति बैठक बस्दैछ । त्यसका लागि भोलि २४ वैशाखमा सचिवालय बैठक बस्नेछ । प्रधानमन्त्री केपी ओलीले अनायासै पार्टी र पार्टी नेताहरुसँग सल्लाह बिनै राजनीतिक दल विभाजनलाई सजिलो पार्ने गरी अध्यादेश ल्याएपछि नेकपामा चर्काे विवाद भएको थियो ।

अन्ततः नेताहरुले विरोध जनाएपछि र भित्री बाहिरी सबैतिरवाट ओली निक्कै आलोचित भएपछि उनी चार दिनमै अध्यादेश फिर्ता लिने अवस्थामा पुगेका थिए । अध्यादेश प्रकरणपछि समाजवादी पार्टीलाई फुटाउनका लागि प्रधानमन्त्रीले बालुवाटारमा बसेर महोत्तरीबाट सांसद अपहरण गरेर काठमाडौं सम्म ल्याउनका लागि आफु निकट सांसदहरु महेश बस्नेत, किसन श्रेष्ठ र पूर्व प्रहरी महानिरीक्षक सर्वेन्द्र खनालसम्म प्रयोग गरेको आरोप लागेपछि नेकपा झन बदनाम हुनपुगेको थियो । 

प्रधानमन्त्री ओलीको कदमले पार्टी र सरकार दुवै आलोचित भएका कारण उनले राजीनामा दिनुपर्ने सम्मको आवाज पार्टी सचिवालय बैठकमै उठ्यो । अन्ततः २० वैशाखको सचिवालय बैठकमा उनले आफुले सरकार र पार्टी सञ्चालनमा कमजोरी गरेको भन्दै आत्मआलोचना गरेर अबका दिनमा कमजोरी नगर्ने, पार्टी कमाण्डमै सरकार सञ्चालन गर्ने र विधि र पद्दतीलाई अंगिकार गरेर जाने प्रतिबद्धता जनाएपछि नेकपाभित्र भूसको आगो झै सल्कदै गएको विवाद केही मथ्थर भएको छ ।

नेकपाका २० जना स्थायी समिति सदस्यले यो प्रकरणपछि यस विषयमा छलफल गर्न स्थायी समिति बैठक माग गर्दै लिखित पत्र नै ओली र प्रचण्डलाई बुझाएका थिए । त्यही कारण बस्न लागेको स्थायी समिति बैठकमा गत शनिवारको सचिवालय बैठकमा भएको सहमतिलाई आधार बनाउदै प्रस्ताव तयार पार्ने जिम्मा अध्यक्ष प्रचण्डले पाएका हुन् । उनलाई प्रस्ताव तयार पार्नका लागि महासचिव विष्णु पौडेलले सघाउनेछन् ।

अध्यक्ष प्रचण्डले प्रस्ताव तयार पार्नु पूर्व शनिवारको सचिवालय बैठकको सहमतिका विषयमा केन्द्रीत रहेर अध्यक्ष तथा प्रधानमन्त्री केपीओली, वरिष्ठ नेता माधव नेपाल, झलनाथ खनाल, नारायणकाजी श्रेष्ठ र महासचिव विष्णु पौडेल लगायत नेताहरुसँग छलफल गरेका छन् । प्रचण्डले ति नेताहरुसँग एक्लाएक्लै र सामुहिक भेटेर पनि छलफल गरेका हुन् । भोलि बिहानसम्म प्रस्ताव तयार पार्ने उदेश्यले प्रचण्ड र महासचिव पौडेल आज छलफलमा बस्दैछन् ।

‘हामी प्रस्ताव तयार पार्न बसिसकेका छैनौं, आज बस्ने तयारीमा छौं, एक चरण बस्यौं भने सकाईहाल्छौं,’ महासचिव पौडेलले भने । प्रस्तावमा प्रधानमन्त्रीले कमजोरी सच्चाउने विधि के हुने ? अध्यक्षहरुको कार्यविभाजनको परिभाषित जिम्मेवारी के के हुने ? एक ब्यक्ति एक पदका विषयमा के गर्ने जस्ता विषयमा प्रस्तावमा विषय समेटिनेछन् ।