सेवा भावले काम गर्नुनै राजनीतिको धर्म होः उपप्रधानमन्त्री सिंह

काठमाडौँ। उपप्रधानमन्त्री एवम् शहरी विकास मन्त्री प्रकाशमान सिंहले निस्वार्थ सेवा भाव र समाजको हित नै राजनीतिको धर्म भएको बताएका छन्।

बुधबार स्याङ्जामा आयोजित श्रीमद्भागवत सप्ताह ज्ञान महायज्ञमा बोल्दै उनले राजनीतिमा सेवा भावले काम गर्नुनै राजनीतिको धर्म भएको उल्लेख गरे।

मानव समाजलाई सुव्यवस्थित अगाडी बढाउन कानून नभएका बेला धर्मले गर्न हुने र नहुने भनेका कुरालाई नै मानिसहरुले कानूनका रुपमा पालना गरेर समाज अहिलेको अवस्थामा आइपुगेकाले धर्मको महत्व विशिष्ट रहेको चर्चा गरे।

‘समाजलाई अगाडी बढाउने क्रममा धर्मसँग हामी संलग्न छौं। धर्मले गर्न हुने र नहुने कामलाई मानिस आफैले छुट्याएर समाजलाई राम्रो हुने काममा अघि बढ्न सिकाएको छ,’ उनले सुनाए,‘ धर्ममा लागू हुने नीति र जुन मान्यता छ। त्यो समाजको हरेक अरु पक्षमा पनि लागू हुन्छ। व्यापारमा पनि धर्म हुन्छ। उद्योगपतिको नि धर्म हुन्छ। विभिन्न व्यवसायमा लागेकाहरुको पनि धर्म हुन्छ। राजनीति गर्नेहरुको पनि धर्म हुन्छ। समाजलाई हित हुने काम हामीले गर्नुपर्छ। सेवाभाव र समाजको हित हुने काम गर्नुनै राजनीतिको धर्म हो।’