बेड संख्याअनुसारको शुल्क नतिर्ने ११ स्वास्थ्य संस्थाबाट १ करोड ७८ लाख रुपैयाँ असुल गरिने

काठमाडौँ । स्वास्थ्य तथा खाद्य स्वच्छता मन्त्रालयले बेड संख्याअनुसार बुझाउनुपर्ने नियमानुसारको शुल्क नतिर्ने ११ वटा स्वास्थ्य संस्थाबाट कुल १ करोड ७८ लाख ८४ हजार रुपैयाँ असुल गर्ने निर्णय गरेको छ।

मन्त्रालयका अनुसार स्वास्थ्य क्षेत्रमा सुशासन, पारदर्शिता र कानुनी जबाफदेहिता सुनिश्चित गर्ने उद्देश्यले उक्त निर्णय कार्यान्वयन प्रक्रियामा अघि बढाइएको हो।

महालेखा परीक्षकको प्रतिवेदनले औँल्याएका विषयहरूलाई सम्बोधन गर्दै बक्यौता रकम असुली प्रक्रिया अगाडि बढाइएको मन्त्रालयले जनाएको छ। मन्त्रालयका अनुसार शुल्क नबुझाएका स्वास्थ्य संस्थाहरूबाट नियमानुसार असुलउपर गर्ने प्रक्रिया अघि बढाइएको छ।

मन्त्रालयले स्वास्थ्य संस्थाको नियमनलाई प्रभावकारी बनाउने, कानुनी दायित्वको पालना सुनिश्चित गर्ने तथा राजस्व व्यवस्थापनलाई व्यवस्थित बनाउने लक्ष्यसहित आवश्यक कदम चालिएको जनाएको छ। साथै, आगामी दिनमा पनि स्वास्थ्य संस्थाहरूले प्रचलित कानुन र मापदण्डअनुसारका दायित्व पूरा गरे नगरेको विषयमा नियमित अनुगमन गरिने मन्त्रालयले उल्लेख गरेको छ।